Hondakinen karakterizazioa: zer botatzen dugun ikertzea

Hondakinen karakterizazioak eremu jakin batean sortzen diren hondakin motak aztertzea esan nahi du, zer botatzen den eta modu jasangarriagoan nola kudea daitekeen ulertzeko. Ikastetxe batean sortutako hondakinak aztertuz, ikasleek hondakinak murrizteko, birziklapena handitzeko eta konpostajea sustatzeko aukerak identifika ditzakete.

IKASKUNTZA-HELBURUAK

Hondakinen karakterizazio-jardueraren bidez, ikasleek honako hauek egin ahal izango dituzte:

• Eskola-ingurunean sortzen diren hondakin motak ulertu.
• Hondakinak murrizteko, berrerabiltzeko eta birziklatzeko moduak identifikatu.
• Hondakinak sailkatzeko, kategoriatan banatzeko eta aztertzeko trebetasunak garatu.
• Ingurumenarekiko kontzientzia eta erantzukizuna sustatu.

TESTUINGURUARI BURUZKO INFORMAZIOA

• IKASGAIAK: Zientziak, matematika, geografia, hizkuntza-gaitasuna eta gizarte-, pertsona- eta osasun-hezkuntza

• EGOKIA: Klase osoarekin egiteko jarduerarako; ingurumen-kontzientziazioaren asteko jarduerarako

• BEHARREZKO DENBORA: Gutxi gorabehera 30 minutu prestaketarako, 1-2 ordu jarduerarako eta 45 minutu jarraipeneko eztabaidarako eta emaitzak aurkezteko

BEHARREZKO MATERIALAK

• Plastikozko xafla edo lona handiak.
• Hondakinak sailkatzeko plastikozko poltsa edo edukiontzi gardenak.
• Hondakin-kategorietarako etiketak —adibidez, papera, plastikoa, elikagai-hondarrak, birziklagarriak eta birziklatu ezin direnak— segurtasuneko eskularruak.
• Arbel-euskarriak edo koadernoak.
• Boligrafoak eta errotuladoreak.
• Datuak erregistratzeko taulak edo grafikoak.
• Hondakinak pisatzeko baskulak.
• Hondakinak manipulatzeko pintzak edo jasotzeko tresnak.
• Hondakinak biltzeko poltsak.
  Eskuetarako desinfektatzailea.
  Eskuak garbitzeko harraska baterako sarbidea.
• Eskuetarako desinfektatzailea.
• Eskuak garbitzeko harraska baterako sarbidea.

PRESTAKETA

1. Aldez aurretik, jakinarazi ikastetxeko langileei eta ikasleei hondakinen auditoretzaren berri, haien lankidetza bermatzeko.
2. Prestatu hondakinak biltzeko gune bat, ikasleek ikasgeletako hondakinak bertara eraman ditzaten.
3. Zabaldu lonak lurrean, hondakinak sailkatzeko lan-eremu garbi bat sortzeko.
4. Etiketatu kategoria bakoitzerako edukiontziak edo poltsak.
5. Ziurtatu ikasleek eskularruak eta segurtasun-ekipamendua dituztela hondakinak modu seguruan manipulatzeko.

IKASGELAKO ATAZAK

1. urratsa: Hondakinak biltzea

• Bildu ikastetxeko hainbat eremutako hondakinak —adibidez, ikasgeletakoak, langileen gelakoak eta jolastokikoak—.
• Ziurtatu talde bakoitzak antzeko hondakin-kantitatea duela sailkatzeko.

2. urratsa: Hondakinak sailkatzea

• Banatu ikasleak talde txikitan eta eman talde bakoitzari sailkatu beharreko hondakinen zati bat.
• Eskatu ikasleei hondakinak honako kategoria hauetan banatzeko: papera, plastikoa, elikagai-hondarrak, birziklagarriak eta birziklatu ezin direnak.

3. urratsa: Datuak pisatzea eta erregistratzea

• Pisatu hondakin-kategoria bakoitza eta erregistratu emaitzak datu-taula batean.
• Animatu ikasleak matematikako ezagutzak erabiltzera ehunekoak eta guztizkoak kalkulatzeko.

4. urratsa: Aurkikuntzak eztabaidatzea

• Aztertu emaitzak klase osoarekin.
• Egin honelako galderak:
  – Zein hondakin mota izan da ohikoena?
  – Hondakinen zer zati birziklatu edo konpostatu zitekeen?
  – Zer aldaketa egin ditzake ikastetxeak hondakinak murrizteko?

5. urratsa: Ekintza-plana sortzea

• Emaitzetan oinarrituta, animatu ikasleak ekintza-plan bat egitera, ikastetxean hondakinak murrizteko.
• Ideia batzuk:
  – Birziklapen-guneak sortzea.
  – Konpostaje-programa bat abian jartzea.
  – Hondakinik gabeko bazkariak sustatzea.

AHOLKUA

Inplikatu eskola-komunitate osoa!
Gonbidatu irakasleak, langileak eta familiak ekimena babestera. Egin kartelak hondakinen murrizketari buruzko kontzientziazioa sustatzeko, eta animatu guztiak parte hartzera.

BA AL ZENEKIEN?

Elikagai-hondarrek sortzen diren hondakin guztien herena osatzen dute. Hondakinak murriztuz, ikastetxeek karbono-aztarna txikitu eta etorkizun jasangarriago bati lagundu diezaiokete.

Europako Batzordeak argitalpen hau ekoizteko ematen duen laguntzak ez du edukia onesten. Eduki honek egileen iritziak islatzen ditu bakarrik, eta Batzordeak ez du bere gain hartzen erantzukizunik edukiotan jasotako informazioa erabiltzeko moduaren gainean.